ஏன் போரட்டம்? என்ன சொல்லுகின்றது விவசாய சட்டங்கள்?

நான் விவசாயி அல்ல. விவசாயத்தின் அடிப்படைகள் குறித்தும் அவ்வளவு புரிதல்கள் கிடையாது. பால் பாக்கெட்டில் வரும், அரிசி மூட்டையில் கிடைக்கும் என்பதே என் அறிதல்கள். ஆகவே இந்த விவசாயிகள் போராட்டம்பற்றிப் பெரிதாக ஆர்வம் எழவில்லை. நேற்று ரிகானாவின் ட்வீட்டும் அதைத் தொடர்ந்து இந்திய கிரிக்கெட் அணியினர் வரிசையாக வந்து அதற்குப் பதில் ட்வீட் போட்டதும் தான், அப்படி என்ன தான் இந்த விவசாய மசோதா சொல்லுகின்றது, ஏன் விவசாயிகள் எதிர்கின்றனர், தமிழகத்தின் நிலை என்ன என்று தேடிப்பிடித்து படித்துப்பார்த்தேன். புரிந்து கொண்ட வகையில் அதை அப்படியே கேள்வி பதிலாகத் தொகுத்திருக்கின்றேன்.

முதலில் இந்த மசோதா என்ன சொல்லுகின்றது?

மூன்று விஷயங்களை இந்த மசோதா சொல்லுகின்றது. முதலாவது மண்டி முறையிலிருந்து விடுபட்டு, விவசாயிகள் நேரடியாக யாருடன் வேண்டுமானலும் வணிகம் செய்து கொள்ளலாம் என்பது. இரண்டாவது ஒப்பந்த அடிப்படையில் விவசாயம் செய்யலாம் என்பது. அதாவது ஆறு மாதத்துக்கு இந்த விலையில் நான் தக்காளி விலைவித்து தருகின்றேன் என்று ஒப்பந்தம் போட்டுக்கொண்டு விவசாயம் செய்வது. மூன்றாவது, அத்யாவசிய உணவுப் பொருட்கள் என்பதன் கீழ் வரும் வெங்காயம், உருளை, பருப்பு போன்றவற்றை அந்தப் பட்டியலிலிருந்து நீக்கி விடுவது தொடர்பானது.

இதனால் என்ன லாபம் (என்று அரசு சொல்லுகின்றது)?

  1. மண்டி முறையை நீக்குவதால் தரகர்களிடமும் மண்டி வரியாக மாநில அரசுக்குச் செலுத்தும் தொகையும் இல்லாமலாகும். விவசாயிகள் யாரிடம் வேண்டுமானாலும் விவசாய பொருட்களை விற்பனை செய்து கொள்ளலாம்.
  2. ஒப்பந்த அடிப்படையில் விவசாயம் செய்யும்பொழுது குறு/சிறு விவசாயிகளைச் சந்தை விலை ஏற்றத் தாழ்வு பாதிக்காது.
  3. அத்யாவசிய உணவு பட்டியலிலிருந்து மேல் கண்ட பொருட்களை நீக்குவதால், இந்தத் துறையில் தனியார்/வெளிநாட்டு முதலீடு அதிகரிக்கும்.

ஏன் இதை விவசாயிகள் எதிர்கிறார்கள்?

  1. அரிசி, கோதுமை போன்றவற்றுக்கு அரசு சார்பில் வழங்கப்படும் ஆதார விலை இனி இல்லாமலாகும். எனவே தனியார் அடிமாட்டு விலைக்கு விவசாய பொருட்களைக் கொள்முதல் செய்வார்கள்.
  2. மேலும் மண்டி அமைப்பிலிருந்து வெளியே வந்தபிறகு ஆள், பண பலம் பொருந்திய பெரிய நிறுவனங்களுடன் சிறு/குறு விவசாயிகள் பேரம் பேசித் தங்கள் பொருட்களை விற்க இயலாது.

இது தவிர்த்து வேறு பிரச்சினைகள் இருக்கின்றனவா?

அ. ஆம். விவசாயம் இதுவரை பெரும்பாலும் மாநில அரசாலேயே கட்டுப்படுத்தப்பட்டு வந்திருக்கின்றது. இந்த மசோதாக்கள் மாநில அரசின் உரிமைகளை மேலும் குறுக்கி அதிகாரத்தை மத்திய அரசை நோக்கி நகர்த்துகின்றது. இந்த மசோதாக்கள் அமல் படுத்தப்படும்போது மாநிலங்களின் வருவாயில் 1 – 8% வரை இழப்பு இருக்கும் என்று கணிப்படுக்கின்றது.

ஆ. இந்த மூன்று மசோதக்களும், அரசு அமைப்பைவிடத் தனியார் அமைப்புகள் சிறப்பாகச் செயல்படும் என்ற முன்முடிவின்படி அமைந்திருக்கின்றது. தனியாரை கட்டுப்படுத்தவோ, கடினமான நேரங்களில் விவசாயிகளுக்கு இழப்பீடு வழங்கவோ எந்தச் சரத்துகளும் இந்த மசோதாக்களில் இல்லை. மேலும் தரகர்கள், விவசாயிகள் இடையேயான உறவானது வியாபரம் அடிப்படையிலானது மட்டுமல்ல. தரகர்களிடமிருந்து விவசாயிகள் முன்பணம்/கடன் பெற்றுக்கொள்கிறார்கள். சிறந்த தரம் மட்டுமின்றி விளைவித்த அனைத்து பொருட்களையும் தரகர் எடுத்துக்கொள்வார், ஆனால் பன்னாட்டு நிறுவனங்கள் இது போன்ற செயல்பட வாய்ப்பு குறைவே.

இ. தற்போது மண்டிகள் மூலமான கொள்முதல் என்பது நாலில் ஒரு பங்குக்கும் குறைவானதே. மீதம் இருப்பவை தனியார் சந்தைகளிலேயே கொள்முதல் செய்யப்படுகின்றன. ஆனால், தனியார், மண்டி விலையை அடிப்படையாக வைத்தே தங்களின் கொள்முதல் விலையைத் தீர்மானிக்கின்றனர். அடிப்படை விலையும், மண்டிகளும் ஒழிக்கப்பட்டால் தனியார் வைத்ததே விலை என்றாகி விடும்.

ஈ. கடைசியாக, உலகளாவிய பெருந்தொற்று காரணமான பொருளாதார மந்தநிலை பல்வேறு உற்பத்தி நிறுவனங்களிலும் சுணக்கத்தை ஏற்படுத்தியுள்ளது. இதனால் பாதிக்கப்பட்ட வெளிநாட்டு முதலீட்டாளர்களை இந்தியாவின் கையிருப்பில் இருக்கும் 90 மில்லியன் டன் தானியங்கள் கவனத்தை ஈர்த்திருக்கக்கூடும். மேலும் இந்த மந்த நிலையிலும் இந்திய உணவு உற்பத்தி மற்றும் விநியோக சங்கிலி சிறப்பாக லாபத்துடன் செயல்பட்டிருக்கின்றது. எனவே இதில் முதலீடு செய்வது அவர்களுக்கு லாபகரமானது. ஆனால், நடைமுறையில் இருக்கும் விநியோக சங்கிலியை உடைக்காமல் அதில் முதலீடு செய்ய முடியாது. ஆக அவர்களுக்குச் சாதகமாக இந்தத் திருத்தங்கள் கொண்டு வரப்பட்டிருக்கலாமெனப் பொருளாதர நிபுணர்கள் கருதுகிறார்கள்.

டெல்லியில் போராடுபவர்கள் யார்?

பஞ்சாப் மற்றும் ஹரியானவை சேர்ந்த விவசாயிகள். கடந்த ஐந்து வருடங்களில், பஞ்சாபில் விளைந்த அரிசி மற்றும் கோதுமையில் 85 சதவீதமும், ஹரியானவின் விளைச்சலில் 75 சதவீதமும் இந்திய அரசால் மட்டுமே கொள்முதல் செய்யப்பட்டு இருக்கின்றது. இவை ஆதார விலையின் அடிப்படையில் வாங்கப்பட்டவை. ஆதார விலையை நீக்கும்போது சந்தை விலை கடுமையாகக் குறையும் என இப்பகுதி விவசாயிகள் அஞ்சுகின்றனர். மேலும் மண்டிக்களுக்காக அடிப்படை கட்டமைப்பு வசதிகளில் இந்த மாநிலங்கள் பெருமளவு முதலீடு செய்துள்ளன. குறிப்பாகக் கொள்முதலுக்காகக் கிராம சாலைகள் அமைத்தது, வலுவான தரகர் அமைப்புகளை உண்டாக்கியது போன்றவற்றைச் சொல்லலாம். பஞ்சாப்பிற்கு மட்டும் மண்டி வரியால் ஆண்டிற்கு 3500 கோடிவரை வருமானம் வருகின்றது. இவை இல்லாமலாகும்போது மக்கள் நலத்திட்டங்களில் செலவிடுவது குறையலாம். இது போன்ற அச்சங்கள் இந்த மாநில விவசாயிகளை டெல்லி வரை போராட்டத்திற்கு வரசெய்திருக்கின்றது.

தமிழகத்தின் நிலை என்ன?

தமிழகத்தில் மூன்று விதங்களில் விவசாய பொருட்கள் கொள்முதல் நடக்கின்றது. முதலாவது முறைப்படுத்தப்பட்ட கொள்முதல், இரண்டாவது தனியாரின் நேரடி கொள்முதல் மூன்றாவது ஓப்பந்த அடிப்படையிலான கொள்முதல். குறிப்பாகக் கரும்பு, பிராய்லர் கோழி முதலியவை ஒப்பந்த அடிப்படையில் தமிழகத்தில் வெற்றிகரமா செயல்பட்டு வருகின்றன. அதே போல முறைப்படுத்தப்பட்ட கொள்முதலுக்கான வரியும் தமிழகத்தில் ஒரு சதவீதம் தான் என்பதால் பெரும் எதிர்ப்பு இல்லை. அதே சமயம், ஆதார விலை உள்ளிட்டம் சில விஷயங்களில் விவசாய சங்கள் மாற்றங்கள் வேண்டும் என்று கோரியுள்ளன.

வாட்ஸப்பின் புது விதிகள் எந்த அளவுக்கு உங்களைப் பாதிக்கும்?

ஜனவரி 4க்கு பிறகு வாட்ஸப் பயனர்களுக்கு அவர்களின் பயனர் விதிகளில் மாற்றம் செய்திருப்பதாக பாப்-அப் வடிவில் ஒரு செய்தி வந்திருக்கும். பெரும்பாலனவர்கள் அப்படியே ‘ஓக்கே’ என்ற பச்சை நிற பொத்தனை அழுத்திவிட்டு செல்ல அதில் ஒரு சில முக்கிய பிரிவுகள் மாற்றப் பட்டிருப்பதாக தொழில்நுட்ப வல்லுனர்கள் தெரிவிக்கின்றனர். இந்த விதிகள் பிப்ரவரி 8 முதல் அமலுக்கு வருகின்றது. ஒருவேளை உங்களுக்கு இந்த விதிகளில் உடன்பாடில்லை என்றால் செயலியை நீக்கிக்கொள்ளலாம் என்று வாட்ஸப்பே தெரிவிக்கின்றது.

எனவே வாட்ஸப்பின் புதிய பயன விதிகள் என்ன சொல்லுகின்றன, எப்படியெல்லாம் அது பயனர்களை பாதிக்கும், ஒருவேளை நீங்கள் வாட்ஸப் செயலியை நீக்க முடிவு செய்தால் மாற்று செயலிகள் என்னென்ன என்பதை பார்ப்போம்.

இதில் உள்ள அடிப்படை கோளாறு, இதுவரை இருந்த வாட்ஸப் தகவல்களை விருப்பப்பட்டால் பிற பேஸ்புக் செயலிகளோடு பகிர்ந்து கொள்ளலாம் என்பது இப்போது விருப்பம் நீக்கப்பட்டு கட்டாயமாக்கப்பட்டு இருப்பது தான். வாட்ஸப் என்ன மாதிரியான தகவல்களை பயனகளிடமிருந்து சேகரிக்கின்றது என்பதை அறிந்தால் இதன் முக்கியத்துவம் விளங்கும்.

வாட்ஸப் உங்களின் மொபைல் எண் மற்றும் புகைப்படத்தைச் சேகரிக்கின்றதை அறிவீர்கள். மேலும், உங்களின் செயலி உபயோகிக்கும் முறை, யார் யாரை தொடர்பு கொள்கின்றீர்கள், செயலியில் எவ்வளவு நேரம் செலவளிக்கிறீர்கள், எந்த மாதிரியான சேவைகளை உபயோகிக்கின்றீர்கள், உங்களுடைய ஸ்டேட்டஸ், அதைப் பார்ப்பவர்கள்பற்றிய தகவல்கள், உங்களைப் பற்றிய ‘about’ தகவல் போன்றவற்றையும் வாட்ஸப் சேகரித்து கொள்கின்றது. கருவியளவில் எடுத்துக்கொண்டால் எந்த அலைபேசி வகையை உபயோகிக்கின்றீர்கள், அதன் IP முகவரி, உங்களுடைய இருப்பிடம் போன்றவற்றையும் வாட்ஸப் சேகரிக்கின்றது. இப்போது இந்தத் தகவல்களைப் பேஸ்புக் மற்றும் அதன் குழும நிறுவனங்களோடு பகிர்ந்து கொள்ள முடிவு செய்து தான் விதிகளில் மாற்றம் கொண்டு வந்துள்ளது.

எனவே இனி வரும் காலங்களில் உங்கள் வாட்ஸப் பயன தகவல்களைக் கொண்டு பேஸ்புக், இன்ஸ்டாகிராம் போன்றவற்றில் உங்கள் தேவைக்கு ஏற்ற விளம்பரங்கள் காட்டப்படும். ஒருவேளை இந்தச் செயலிகளை நீங்கள் உபயோகிக்காத போதும் உங்கள் தகவல்கள் சேமிக்கப்பட்டு பேஸ்புக் விளம்பர சேவையை உபயோகிக்கும் பிற நிறுவனங்களுக்குக் கொடுக்கப்படும்.

மேலும் வாட்ஸப் தற்போது இந்தியாவில் பண பரிமாற்றம் செய்யும் வசதியையும் கொண்டுள்ளது. ஒருவேளை வாட்ஸப்பை உபயோகப்படுத்தி நீங்கள் பண பரிவர்த்தனை செய்யும்பட்சத்தில் உங்கள் வங்கி தொடர்பான தகவல்கள், ஏதேனும் பொருட்கள் வாங்கியிருப்பின் அந்தத் தகவல்கள், அவை அனுப்பப்படும் முகவரி போன்றவையும் வாட்ஸப்பால் சேகரிக்கப்பட்டு, பேஸ்புக் உடன் பகிர்ந்து கொள்ளப்படும்.

இதில் குறிப்பிட தகுந்தது இந்த விதிகள் ஐரோப்பிய யூனியனில் செல்லுபடியாகது என்பது தான். காரணம் அவர்களின் கண்டிப்பான தகவல் பாதுகாப்பு பற்றிய சட்டங்கள். இந்தியாவில் அம்மாதிரியன விதிகள் எதுவும் இல்லாத நிலையில், நிசமாகவே நாம் கவலைப்பட காரணம் இருக்கின்றது. ஏனெனில் ஐரோப்பிய யூனியன் விதிகளின் படி ஒரு சேவையை உபயோகப்படுத்துவதற்காகத் தரப்படும் தகவலானது அதற்காக மட்டுமே உபயோகப்படுத்தப்பட வேண்டும். எடுத்துக்காட்டாக, இப்போது நான் என் நண்பர்கள் மற்றும் குடும்பத்தாராடு தொடர்புகொள்ள கொடுக்கப்படும் அலைப்பேசி எண்னானது, வணிக நிறுவனங்களின் நலனுக்காகத் தரப்படக் கூடாது. மாறாக, வாட்சப்பின் தற்போதைய விதிகள் அவ்வாறு தரப்படுவது மட்டுமின்றி வணிக சேவையாகப் பேஸ்புக் மூலம் பிறருக்கு வழங்குவதற்கும் வழி செய்கின்றது.

இதை ஒரு உதாரணமாகச் சொன்னால் இன்னும் எளிதாக விளங்கும். உங்கள் அலைபேசி எண்ணுக்கு ரீசார்ஜ் செய்ய வேண்டும் என ஒரு மொபல் கடையில் உங்கள் நம்பரை சொல்லுகின்றீர்கள். உங்களுக்கு அவர் ரீசார்ஜூம் செய்து விடுகின்றார். ஆனால் உங்கள் நம்பரை பக்கத்து தெரு மளிகை கடைக்காரருக்கும், பக்கத்து ஊர் ஜவுளி கடைக்கும் விற்று விடுகிறாரென வையுங்கள், அவர்களும் உங்களுக்கு ஸ்டாக் வந்திருச்சே என்று செய்தி அனுப்பினால் சங்கடாமாய் உணர்வீர்கள் அல்லவா அது தான் இப்போது நடப்பது. இதை இன்னும் தீவிரமாகப் பார்த்தால், உங்கள் மொபைல் கடைக்காரர் மறுமுறை நீங்கள் அங்குப் போகும்போது உங்களுக்கு ஒரு மாசத்து ப்ரீ ரீசார்ஜ் ஆனா நான் சொல்லற ஒரு ஆப் மட்டும் இன்ஸ்டால் பண்ணிக்கனும். அது ஒன்னும் பண்ணாது நீங்க என்ன இன்டெர்நெட்ல தேடறீங்க ப்ளஸ் எங்க இருக்கறீங்கங்கற தகவல மட்டும் எனக்கு அனுப்பும் வேற எதும் இல்லை என்று சொல்லுகிறாரென வையுங்கள், நீங்களும் தலையாட்டிக்கொண்டு வந்து விடுகிறீர்கள். அன்று சும்மா ஏதோ ஆர்வத்தில் சிகரெட்டில் என்னென்ன வகை இருக்கின்றது என்று தேடிப்பார்க்க, மறுநாள் மனைவியோடு பஸ் ஏறப்போகும்போது தம்பி புது சிகரெட் ப்ராண்ட் வந்திருக்கு ட்ரை பண்ணரீங்களா என வழியில் இருக்கும் கடைக்காரர் கேட்டால் கொஞ்சம் சங்கடம் தானே? இது நாம் பொதுவாக அனுமானிப்பது. இன்னும் செயற்கை அறிவு தொழில்நுட்பத்தைக் கொண்டு நீங்கள் எதை எப்போது விரும்ப வேண்டும் என்பது வரை முடிவு செய்ய முடியும் என்கின்றனர்.

மேலும், இந்தத் தகவல்கள் பிற நிறுவனங்களிடையே பகிர்ந்து கொள்ளும்போது திருடு போனால் அது சார்பாக நீங்கள் வாட்சப்பையோ பேஸ்புக்கையோ கேள்வி கேட்க முடியாது. உங்கள் UPI மொபைல் நம்பரும், வாட்சப் நம்பரும் ஒன்றாய் இருந்து அது வாட்ஸப்க்கு வெளியே கசிந்து ஊடுருவல்காரர்களால் உங்கள் வங்கி பரிவர்த்தனை தவறாகப் பயன்படுத்தப்பட்டால், இதில் வாட்சப்பை யாரும் ஏன் தகவலைச் சரியாகப் பாதுகாக்கவில்லையெனச் சட்டபூர்வமாகக் கேள்வி கேட்க முடியாது. மேலும் வாட்சப் சொல்லும் என்கிர்ப்ஷான் வாதம் மெசேஜுகளுக்கு வேண்டுமானால் சரியாய் இருக்கலாம் ஆனால் அது மெட்டா டேட்டாவுக்கு பொருந்தாது. இதற்கு முன் அமெரிக்காவில் பல வழக்குகளில் வெறும் வாட்சப் மெட்டா டேட்டாவை மட்டும் வைத்தே மிகசுலபமாகக் குற்றவாளிகள் கண்டுபிடிக்கப்பட்டுள்ளனர். மேலும் புகைப்படங்கள், உரலிகள் போன்றவை வாட்சப் சர்வரில் சேமிக்கப்படுகின்றன. ஏற்கனவே வாட்சப்பில் ஒரு அமேசான் லிங்க் அனுப்பினால், அந்த நபரின் பேஸ்புக், யூட்யூப் விளம்பரங்களில் அது சம்பந்தமான விளப்பரங்கள் வருவதாகப் பலர் குற்றம் சாட்டியுள்ளனர். எனவே, ‘நம்ம அனுப்பற மெசேஜ வச்சி என்ன பண்ண போரானுக’ என்றோ, ‘சரி, பேஸ்புக்கு மட்டும் தானே போகும்’ என்று நினைத்துவிடாதீர்கள். ஏறத்தாழ இது “2:00 AMக்கு பல்லாவரம் டாஸ்மாக்கிலிருந்து கவிதாவுக்கு மெசேஜ் அனுப்பினேன்” என்பதை உங்கள் வாசல் சுவற்றில் எழுதி வைப்பதை போன்றது. செய்தியின் முக்கியத்துவம் அது யாரை சென்றடைகிறது என்பதில் தான் இருக்கின்றது.

வாட்சப்பின் சமீபத்திய அறிவிப்புக்குப் பின் இது சம்பந்தமாகப் பலர் எச்சரித்தும், பலர் சிக்னல் போன்ற மாற்று செயலிகளுக்கு மாறியும் வருகின்றனர். டாடா ஸ்டீல் போன்ற நிறுவனங்கள் வாட்சப்பில் பணி தொடர்பான எந்தத் தகவல்களையும் பகிர்ந்து கொள்ள வேண்டாமெனத் தன் பணியாளர்களைக் கேட்டுக்கொண்டுள்ளன. இந்த நிலையில், நீங்கள் ஒரு வாட்சப் பயனாளறாக இருந்தால் தெரிந்து கொள்ள வேண்டிய முக்கிய விஷயங்கள் கேள்வி பதிலாகக் கீழே:

  1. எப்போதிருந்து என்னுடைய தனிப்பட்ட தகவல்கள் வாட்ஸப்பால் திரட்டப்படும்?

ஏற்கனவே வாட்ஸப் இந்தத் தகவல்களைத் திரட்டிக் கொண்டு தான் இருக்கின்றது. ஆனால் பிப்ரவரி 8ல் இருந்து இந்தத் தகவல்கள் பேஸ்புக் மற்றும் அதன் பிற நிறுவனங்களோடு பகிர்ந்து கொள்ளப்படும்.

  1. அவ்வாறெனில் இனி வாட்சப்பில் விளம்பரங்கள் காட்டப்படுமா?

இல்லை. அம்மாதிரியான திட்டம் எதுவும் இல்லையென வாட்சப் தெளிவு படுத்தியுள்ளது. ஆனால் உங்களின் வாட்சப் தகவல் பிற பேஸ்புக் தளங்களில் விளம்பரம் காண்பிப்பதற்க்கு உபயோகித்து கொள்ளப்படும். அதே சமயம் வாட்சப்பில் பிஸினஸ் அக்கெளண்டுகள் என்று இருப்பதை நீங்கள் பார்த்திருக்கக்கூடும். அவர்களுடன் இந்தத் தகவல்கள் வணிகரீதியாகப் பகிர்ந்து கொள்ளப்படும். எனவே அவர்கள் நேரடியாக வாட்ஸப்பில் உங்களைத் தொடர்பு கொள்ள முடியும். அவர்களுக்கு நீங்கள் அனுப்பும் தகவல்களின் பாதுக்காப்புக்கு வாட்சப் எந்த விதமான உத்திரவாதமும் வழங்காது. அந்தந்த நிறுவனத்தின் தகவல் கையாளுதல் விதிகளின் படி அவை செயல்பட்டுக்கொள்ளலாம்.

  1. வாட்ஸப் பிஸினஸ் அக்கெளண்டுகளுக்கு என்னுடைய தகவல்களை வாட்ஸப் தருவதால் எனக்கு என்ன மாதிரியான பிரச்சனைகள் வரக்கூடும்?

வாட்சப்பின் இப்போதைய விதிகளின் படி நீங்கள் ஒரு பிஸினஸ் அக்கெளண்டுக்கு ஒரு பொருள் தேவையெனச் செய்தி அனுப்பினால் அந்தத் தகவல் பிற அதே போன்ற அக்கெளன்டுகளுக்கும் பகிர்ந்து கொள்ளப்படும். எனவே, தகவல்களின் ரகசியம் மற்றும் உங்களின் விருப்ப தேர்வுகளில் பிரச்சனை ஏற்படக்கூடும்.

  1. என் தகவல்களைப் பற்றிக் கவலை இல்லை என்றால் நான் செய்ய வேன்டியது என்ன?

ஏதுமில்லை. ஒருவேளை உங்களுக்குப் புதிய விதிகளை ஏற்றுக்கொள்ளும்படியான செய்தி ஏதும் வராதிருந்து இனி வந்தால் ‘ஏற்றுக்கொள்கிறேன்’ என்கின்ற பொத்தானை அழுத்த வேன்டியது மட்டும் தான் நீங்கள் செய்ய வேண்டியது.

  1. இல்லை. என் தகவல்களைப் பேஸ்புக் நிறுவனங்களோடு பகிர்ந்து கொள்ள எனக்கு விருப்பம் இல்லை என்றால் நான் என்ன செய்ய வேண்டும்?

அப்படியெனில் வாட்ஸப் உபயோகிப்பதை விட்டு வெளியேருவதை தவிர வேறு வழி இல்லை. அதற்கு நீங்கள் வாட்ஸப் செயலியை நீக்கினால் மட்டும் போதாது, அதற்கும் முன் செட்டிங்கிஸ்ல் சென்று உங்கள் கணக்கையும் நீங்கள் நீக்க வேண்டும். (Settings > Accounts > Delete my account)

  1. வாட்ஸப்க்கு மாற்று இருக்கின்றதா?

ஒப்பன் சோர்ஸ் செயலிகள் முதற்கொண்டு பல மாற்று செயலிகள் உள்ளன. குறிப்பாக டெலிகிராம் மற்றும் சிக்னல் ஆகிய இரண்டு செயலிகளும் சமீபத்தில் அதிக கவனம் பெற்றுள்ளன.

  1. இரண்டில் எது சிறந்தது?

உபயோகத்தின் அடிப்படையில் பார்த்தால் டெலிகிராம் சிறந்தது. பாதுகாப்பின் அடிப்படையில் சிக்னல். மேலும் சிக்னல் பயனர் குறித்த எந்த விதமான தகவல்களையும் சேமிப்பதில்லை. ஆனால டெலிகிராம் ஒரு சில தகவல்களைச் சேகரித்தாலும் இதுவரை அரசு, வர்த்தக நிறுவனங்கள் போன்றவற்றுடன் பகிர்ந்து கொண்டதில்லை என்று கூறுகின்றது. வருங்காலத்தில் பிஸினஸ் அக்கெளண்டுகளில் மட்டும் விளம்பரம் செய்ய இருப்பதாகவும் டெலிகிராம் தெரிவித்துள்ளது.

கீழ்காணும் தகவல்களை முறையே வாட்சப், டெலிகிராம் மற்றும் சிக்னல் செயலிகள் உபயோகிப்பாளரிடம் இருந்து சேகரிக்கின்றன.

1. வாட்சப்:

  1. செயலி இருக்கும் கருவி
  2. பயன பற்றிய தகவல்கள்
  3. விளம்பரம் பற்றிய தகவல்கள்
  4. பொருள்கள் வாங்கிய தகவல்கள்
  5. தோரயமான இடம்
  6. அலைபேசி எண்
  7. மின்னஞ்சல் முகவரி
  8. அலைபேசியில் இருக்கும் பிறர் எண்கள், தகவல்கள், மின்னஞ்சல்கள்
  9. வாட்சப் உபயோகிக்கும் முறை
  10. உபயோகிக்கும் போது செயலில் ஏற்படும் கோளாறுகள்
  11. செயலியின் செயல் திறன்
  12. வேறு சோதனைகள் ஏதும் இருப்பின் அது பற்றிய தகவல்கள்
  13. பண பரிவர்த்தனை தொடர்பான தகவல்கள்
  14. வாட்ஸப் பயனர் உதவி பற்றிய தகவல்கள்
  15. பகிர்ந்து கொள்ளப்படும் படங்கள், இணையதள உரலிகள் பற்றிய தகவல்கள்

2. டெலிகிராம்:

  1. பயனர்எண்
  2. பயனர் பற்றிய தகவல்கள்
  3. அலைபேசியில் இருக்கும் பிறர் எண்கள்

3. சிக்னல்:

  1. ஏதுமில்லை (பயனரின் எண் சேமிக்கப்பட்டாலும் அதுவும் என்க்ரிப்ட் செய்யப்பட்டிருக்கும்).

பத்து புத்தகங்கள்

Goodreads.comன் ஓராண்டு வாசிப்பு சவால் எனக்குப் பிரியமான ஒன்று. இந்தாண்டு படித்த 104 புத்தகங்களிலிருந்து எனக்கு மிகப்பிடித்த மற்றும் பிறர் கண்டிப்பாகப் படிக்க வேண்டும் என நான் எண்ணும் பத்து புத்தகங்கள் இவை:

  1. அக்னி நதி – குர் அதுல்ஜன் ஹைதர்
  2. நீலகண்ட பறவைத்தேடி – அதில் பந்தோபாத்யாய
  3. தர்பாரி ராகம் – ஸ்ரீலால் சுக்லா
  4. ஓநாய் குலச்சின்னம் – ஜியாங் ரோங்
  5. கிருஷ்ணனின் ஆயிரம் நாமங்கள் – போகன் சங்கர்
  6. ஆதியிலே நகரமும் நானும் இருந்தோம் – பா. ராகவன்
  7. Who is Bharat Mata? – Jawaharlal Nehru
  8. இன்றைய காந்திகள் – பாலசுப்பிரமணியன் முத்துசாமி
  9. வானமே எல்லை – ஜி. ஆர். கோபிநாத்
  10. ஐயாவின் கணக்குப் புத்தகம் – அ. முத்துலிங்கம்

இதில் அக்னி நதி, நீலகண்ட பறவையைத் தேடி மற்றும் தர்பாரி ராகம் – மூன்றையும் இந்திய இலக்கியவரிசையின் கிளாசிக்குகள் எனலாம். இதில் முதல் நாவல் முதல் நூற்றாண்டிலிருந்து இந்திய விடுதலை வரையிலான பல கதைகளைச் சொல்ல, நீலகண்ட பறவையைத்தேடி இந்திய பிரிவினையின் வலியைக் கவித்துவமாகச் சொல்லிச் செல்கின்றது. தர்பாரி ராகம் மேற்கண்ட இரண்டில் இருந்தும் முற்றாக வேறு பட்டு இன்றைய இந்திய அரசியலை எள்ளி நகையாடுகின்றது. இவை மூன்றையும் குறித்த விரிவான அறிமுகத்திற்கு எழுத்தாளர் ஜெயமோகனின் இந்தக் கட்டுரைகளைப் பார்க்கலாம்.

குர்அதுல் ஜன் ஹைதரின் ‘அக்னி நதி ‘

அதீன் பந்த்யோபாத்யாய’வின் ‘நீலகண்ட பறவையை தேடி’

ஸ்ரீலால் சுக்லாவின் தர்பாரி ராகம்

ஓநாய் குலச்சின்னம் கம்யூனிச சீனாவில் எப்படி அதன் தொல்கதைகள் திருத்தி எழுதப்பட்டு சிதைக்கபடுகின்றன எனச்சொல்லுகின்றது. இதில் குறிப்பிட்டு சொல்லவேண்டியது சி. மோகனின் மொழிபெயர்ப்பு. ஒரு அந்நிய நிலத்தை நம் நிலமாகக் காணவைக்கின்ற அளவிலான செறிவான அமைதியான மொழிநடை. (ஓநாய் குலச்சின்னம் பற்றிச் சொல்வனத்தில் வெளியான சரவணின் கட்டுரை.)

கிருஷ்ணனின் ஆயிரம் நாமங்கள் நிஜமாகவே என்னை ஆச்சரிப்படுத்திய புத்தகம். போகன் கவிதைகள் எழுதுவாரென அறிவேன். கதைகளைப் படிப்பது இதுவே முதன்முறை. புத்தகத்தின் கதைகள் மழையில் நனைந்த கோவில் சிலைகளெனக் கவித்துவாய அமைந்திருந்தன. இதே போலச் சுவரசியமாய் படித்த இன்னொரு புத்தகம் பாரா’வின் ஆதியிலே நகரமும் நானும் இருந்தோம். இந்தாண்டு பாராவின் வேறுசில புத்தகங்களைப் படித்திருந்தாலும் இந்தப் புத்தகம் மனதுக்கு நெருக்கமாய் இருந்தது. ஓர் ஊரின் வரலாறு ஓர் ஆறைப் போல ஒழுகியோடிக்கொண்டே இருக்கின்றது. நேற்று கண்ட நகரமில்லை இன்றிருக்கும் நகரம். சென்னையின் சில பத்தாண்டுகளின் வரலாறை அதன் உன்னதங்களை சுவாரசியமாய் சொல்லியிருக்கிறார் பாரா.

ஐயாவின் கணக்குப் புத்தகம் எனக்கு மிக விருப்பமான எழுத்தாளர் அ. முத்துலிங்கத்தின் புதிய புத்தகம். தமிழில் சுஜாதாவிற்கு பிறகு இத்தனை சுவாரசியமாய் கட்டுரை எழுதும் வேறு எழுத்தாளர் இருப்பதாய் தெரியவில்லை. புத்தக தலைப்பான கட்டுரையை இந்தச் சுட்டியில் வாசிக்கலாம் (https://www.vinavu.com/2020/02/12/a-muthulingam-short-story-my-fathers-account-book/).

Who is bharat mata புத்தகம் பண்டித நேருவின் தேர்ந்தெடுத்த கட்டுரைகளை/கடிதங்களைக் கொண்டிருக்கிறது. நேரு போன்ற ஒருவர் பிரதமர் ஆனது சுதந்திர இந்தியாவின் அதிர்ஷ்டம். அவரின் ஆளுமையை, அறிவியலில், வரலாற்றில் அவருக்கு இருந்த ஆழந்த புலமையை மற்றும் இந்தியாவின் மீதும் இந்தியர்களின் மீதும் அவருக்கிருந்த தீராத காதலை ஒரு குறுக்குவெட்டு தோற்றத்தில் காண இந்த நூல் பெரிதும் உதவும்.

அதே போல காந்தியத்தின் நிகழ்கால சாத்தியங்கள் பற்றிய பாலாவின் இன்றைய காந்திகளும் ஒரு முக்கியமான புத்தகம். காந்தி தன் வாழ்நாளில் எத்தனையோ காந்திகளை உருவாக்கியிருக்கிறார். அந்த மரபில் இன்றும் இருக்கும் பத்து நபர்கள்/நிறுவனங்கள் பற்றிய சிறந்த அறிமுகக் குறிப்பு இந்த புத்தகம்.

இறுதியாகச் சூரரைப்போற்று பார்த்துவிட்டு, தொடர்சியாக வானமே எல்லை படிக்க வந்தவர்களில் நானும் ஒருவன். திரைப்படத்திற்கு சற்றும் தொடர்பின்றி ஒரு சாகசக்காரனின் டைரி குறிப்புகள் இந்தப் புத்தகம். விவசாயி, தொழில் முனைவரிலிருந்து விமான நிறுவன அதிபர் என உயர்ந்திருக்கிறார் கோபிநாத். அதனை அதே சுவரசியத்தோடு எழுத்தாக்கியும் இருக்கிறார். படத்தைப் பல மடங்கு சுவாரசியம் உறுதி.

Seedr: The Ultimate Way of Torrenting!

I think during my post graduation days, around 2009, I came around the concept of torrents. Those were the times, we got used to multimedia and digital contents. As a third world citizen it is always hard for us to accesses the cutting edge educational as well as other digital contents. Torrents, whether official or unofficial, was the only source to access those things.

I remember the days, we, roommates build our own desktop computer from second hand accessories. There were the golden days, the power cut was almost null. So, we will add a torrent file and the system will run upon two three days to download the entire file that’s size may around 1 or 2 GB.

Then, slowly scenes were changed. We got some better internet. But still it would take at least a day to complete a torrent download. That time I was into a Linux app called Deluge, which I still use though. There was web torrent too. But that also struck at times and it’s not that much user-friendly.

On one fine day, I just got to know about seedr.cc via the online Tamil magazine vikatan. On a first read, I didn’t get its concept. But with a curiosity, I just log into it and gave a try. What stunned me is its supper fast seed collection. Literally within a minute, entire torrent file is downloaded in your cloud storage. All you have to do is either enjoy the multimedia content online or you can download it to your local machine storage.

Nowadays, excluding some extra large files (yup, I’m still using their free plan) I always go for seedr.cc for torrent downloading. Is there any downside? For me, its nill. For a free plan, they offer 2 GB, which is suffice for certain tasks. Even though some slowness in downloading files nowadays, I am not sure whether its due to my ISP or due to seedr server. But still that lag is ignorable and in terms of downloading 1 GB in 10 – 15 mins in Indian scenario.

So am I going to upgrade for their Pro plan? May be. Because, in a month I am torrenting about or less than 10 GB. Mostly these files are multimedia contents, and I am using that for entertainment purpose. There are few instances like, OS or software downloading I really wish to upgrade my storage. But again in terms of Indian scenario, 7$ for month (that’s my internet bill for three months) is significant, and I am always oscillating. Considering the fast and easy downloading option, may be on another fine day, I may jump and turn into a Seedr Pro.

So, what’s my suggestion for you? I believe, mostly my colleagues, friends and students are reading these. And heh permanent employee don’t hesitate, just go for their pro plan. Others, like me, you may try their free plan for a while. You will just realize what I meant as amazing, then depending upon your needs and budget, you can go for their Pro plan. And for the students, use their free plan and if you’re getting enough financial support then you can also be a pro.

பாரம்பரிய மருத்துவத்தில் என்ன தான் பிரச்சினை?

ஏன் அலோபதி மட்டும் தான் மருத்துவமுறையா? மாற்று மருத்துவமே கிடையாதா? இருநூறு முன்னூறு ஆண்டுகளுக்கு முன்பெல்லாம் நாம் எப்படி மருத்துவம் செய்து கொண்டோம் என்ற குரல்களில் இருந்து, கபாசுரகுடிநீரை உலகெங்கும் பரப்பி கொரோனாவை ஒழித்து நம் முன்னோர் புகழ் பரப்ப வேண்டும் என்பது வரை குரல்கள் சமீபமாக ஒலித்து வருகின்றன. அவர்களுக்காக இந்த கட்டுரை.

முதலில் மாற்று மருத்துவம் என்கிற பதத்தையே நான் நிராகரிக்கிறேன். உங்கள் வண்டிக்கு அப்போலோ டயர் போட்டு இருக்கின்றீர்கள், சரியில்லை என எம்.ஆர்.எப்க்கு சென்றால் அது மாற்று. மரடயர் மாட்டி ஓட்டுவேன் என்பது வெறும் பிதற்றல். அதெப்படி ரப்பரில் ஓடும் வண்டி மர டயர் இட்டால் ஓடாதா என்றால் ஓடும். ஒன்று அது ரப்பர் டயர் அளவு ஆப்டிமைஸ் செய்யப்பட வேண்டும் அல்லது அப்படி ஓட்டுவதால் வரும் விளைவுகளை சந்திக்க வேண்டும். ஏறத்தாழ இதே நிலை தான் பாரம்பரிய மருத்துவத்திற்க்கும்.

இன்னோரு எடுத்துக்காட்டை பார்ப்போம். உங்களுக்கு நெஞ்சு வலிக்கிறது. ஒரு மாத்திரை போட எண்ணுகிறீர்கள். ஒருவர் வந்து, அந்த மாத்திரையை நூறாக உடைத்து அதில் ஒரு துண்டை எடுத்து நூறு லிட்டர் நீரில் கலக்குகிறார். பின் அதில் இருந்து ஒரு மில்லி எடுத்து மறுபடி ஒரு நூறு லிட்டர் நீரில் கலக்குகிறார். இப்படியே முன்னூறு முறை செய்த பிறகு கடைசி ஒரு மில்லியை உங்களிடம் தந்து இந்தா இது அந்த மாத்திரையை விட ஆயிரம் மடங்கு சக்தி வாய்ந்தது ஆனால் பக்க விளைவுகள் இல்லாதது என்கிறார். குறைந்தபட்ச அறிவோ அல்லது பன்னிரென்டாவது வேதியலோ படித்தவர்கள் சிரித்துவிடுவார்கள் இதற்கு. ஆனால் ஹோமியோபதி மருந்துகள் இப்படித்தான் தயார் ஆகின்றன. இதைக்கொண்டு தான் கொரோனாவை குணப்படுத்த வேண்டும் என்கிறார்கள். வெளிநாடுகளில் ஹோமியோ மருந்துக்களில் placebo என்று முத்திரை குத்தப்பட்டு வர, நம் நாட்டில் தான் அதற்கொரு மினிஸ்ட்ரியை உருவாக்கி அவர்கள் வாட்ஸப் பார்வர்டுகளை விட மோசமாக அறிக்கை விட்டுக்கொண்டு இருக்கிறார்கள்.

அதே போல நிச்சயமாய் இயற்கையாய் கிடைக்கும் பொருட்களுக்கு மருத்துவதன்மை உண்டு தான். ஆனால் அதை எந்த அளவுக்கு உபயோகிப்பது என்பது தான் கேள்வி. பாலில் மிளகுத்தூள், மஞ்சள் போட்டு குடித்தால் இருமல் குறையும். ஆனால் டிபி’க்கு இதை மட்டுமே மருந்தாக பரிந்துரைக்கலாமா? மேலும் சித்த/ஆயுர்வேத மருத்துவம் குடும்ப தொழிலாக அவர்களுக்குள் மட்டும் புழங்கி கொள்கிற ரகசிய மொழியாகவே இருந்து வந்துள்ளது. காலவோட்டத்தில் இவை சிதைந்த பின் இது தான் சித்த மருத்துவம் என்று ஏமாற்றும் கும்பலே இப்போது அதிகம்.

இன்னொன்று சித்த மருத்துவத்தின் அடிப்படைகள் பல சித்தர் பாடல்களில் இருந்து வருகிறது. அவை பெரும்பாலும் தத்துவ புலம்பல்கள். இருபொருள் கொள்ளத்தக்க வரிகளே அதில் அதிகம் (சித்தர் பாட்கள் என்று வழங்கும் 18, 19ம் நூற்றாண்டு பாடல்கள் பெரும்பாலும் இட்டுகட்டியதே. மொழியியல், ஏன் சித்த அறிஞ்சர்களே அவற்றை பொருட்படுத்துவதில்லை). அவற்றின் உண்மையான பொருள் அறிந்தாலும் அதில் குறிப்பிடப்பட்டிருக்கும் தாவரங்களை நாம் அறியோம். வெகுபரவலாக படிக்கப்பட்டு, ஆய்வு செய்யப்பட்டு, விவாதிக்கப்பட்டு வரும் சங்க இலக்கியத்தில் வரும் தாவரங்களையே நாம் இன்னும் முழுமையாக அறிந்து கொள்ளவில்லை. ஏனெனில் பண்பாட்டு கலாச்சர மாற்றதிற்கு ஏற்ப தாவரங்களின் பெயர்களுக் மாறி வந்துள்ளன. கர்னாடக இசை தான் தமிழிசை. ஆனால் அதில் உள்ள ஒரு ராகத்தை சங்க பண்ணோடு நம்மால் இணைக்கமுடியுமா? நிலைமை இப்படி இருக்க குத்துமதிப்பாக புரிந்து கொள்ளப்பட்டு குத்துமதிப்பாக தான் செயல்பட்டு வருகிறது சித்த ஆயுர்வேத மருத்துவம்.

இதில் முக்கியமானதொன்று, சித்த மருத்துவத்தில் பதப்படுத்தி மருந்து வழங்கிய செயல்கள், என் சிற்றறிவுக்கு எட்டிய வரை, குறைவு தான். பெரும்பாலும் வைத்தியர் வீடுகளுக்கு அன்றன்று சென்று மருந்தரைத்து பெற்றுவருவது நடந்திருக்கும் அல்லது வழங்கப்பட்ட குறிப்புகளை கொண்டு வீட்டிலேயே தயாரிக்கப்பட்டிருக்கலாம். ஆனால் இன்று வழங்கப்படும் சித்த/ஆயுர்வேத மருந்துகள் எப்படி தயாரிக்கப்படுகின்றன? பெரும்பாலான சித்த மருந்துகளில் உலோகங்களோ, செயற்கை வேதிப்பொருட்களோ கலக்கப்பட்டு ஸ்டபளைஸ் பண்ணப்படுகிறது. இதில் உலோக கலப்பு மிகப்பெரிய பாதிப்பை உண்டு பண்ணக்கூடியது. உத்திரவாதமாய் கிட்னி சட்னியாகிவிடும்.

ஏன் அலோபதியில் பின் விளைவுகள் இல்லையா? நிச்சயமாய் இருக்கிறது. ஆனால் அதையும் தாண்டி பலனளிக்க கூடியது. 30 – 40 சராசரி வாழ்நாளாக இருந்தது இன்று 68 ஆகியிருப்பது அலோபதியால் தான். கண்டிப்பாக இதில் நிறுவனங்களின் பேராசை இருக்கிறது, மக்களை கொள்ளையடிக்கிறார்கள் இன்னும் பல குறைகள் இருக்கிறது ஆனாலும் மாற்று மருத்துவத்தை விட சிறந்தது. நாம் மாற்றம் கொண்டுவர வேண்டியது இங்குதானே ஒழிய ஒட்டு மொத்தமாய் மரப்பக்கு திரும்புகிறேன் என்பதல்ல. அப்படியானால் சித்தா, ஆயுர்வேதம் இருக்கக்கூடாதா? இருக்கலாம். அவற்றின் விதிகள் யுனிவர்சலாக இருப்பின். இந்த நோய்க்கு இந்த மருந்து எடுத்தால், அது இப்படி செயல்பட்டு இவ்வாறு நோய் நீக்கும் என்று சொல்ல முடிந்தால் அவற்றை முயற்சிக்கலாம். அதைவிட்டு கபசுரநீர் அருந்தினால் எதிர்ப்பு சக்தி பெருகும் என்று ஜல்லி அடிப்பது சரிப்பட்டு வராது. ஏனெனில் வழைப்பழமும் எதிர்ப்புசக்தி தரும், எழுமிச்சையும் தரும், இஞ்சியும் தரும். இவற்றின் எதிர்ப்புசக்தி அளவென்ன, இவற்றை விட கபசுரநீர் எப்படி சிறந்தது. அது எப்படி செயல்படுகிறது என்பதை விளக்காத வரை இது அரைகுறை ஆர்வக்கோளாறாகவே பார்க்கப்படும்.

இறுதியாக அரசே இம்மாதிரி பரிந்துரைப்பதை உண்மையிலேயே திசை திருப்பும் வேலையாகத்தான் நான் பார்க்கிறேன். பொது மருத்துவ கட்டமைப்பை மேம்படுத்துவது, மக்களிடம் விழிப்புணர்வு ஏற்படுத்துவது, மருத்துவர்களுக்கு பாதுகாப்பு உபகரணங்கள் வழங்குவது என எத்தனையோ விஷயங்கள் செய்வதற்கு இருக்க, கபசுர குடிநீர வழங்கிவிட்டோம் இனி ஒன்றும் பிரச்சனை இல்லை என்பது போன்ற தோற்றத்தை ஏற்படுத்துவதே மிகப்பெரிய ஏமாற்று வேலைதான். மக்களுக்கு எல்லாவற்றிலும் புது டெக்னாலஜி வேண்டும். ஆனால் ஏன் மருத்துவத்தில் மட்டும் இந்த பிற்போக்குத்தனம்? பசுமை புரட்சி இல்லையென்றால் லட்சகணக்கானோர் பசி பட்டினியில் இறந்திருப்பார்கள். வெண்புரட்சி இல்லையேல் பலநூறு சவளை குழந்தைகள் பத்து வயதிற்க்கு முன்பே இறந்திருக்கும். நவீன மருத்துவம் இல்லையேல் அம்மை, வைசூரி, காலரா என்று மனித இனமே அழிந்திருக்கும்.

இது ஒரு மாபெரும் மானுட சங்கிலி. பல்லாயிரம் பேரின் உழைப்பும் தியாகமும் நம்மை இங்கு கொண்டு வந்து சேர்த்திருக்கின்றன. இதை விமர்சிப்பது எளிது. ஆனால் கைவிட்டு மாற்றை உண்டாக்குவது சாத்தியமே இல்லாத ஒன்று. எத்தனை வேண்டுமானாலும் தூற்றலாம், எதனை வேண்டுமானாலும் எடுத்துக்கொள்ளலாம் ஆனால் இறுதியில் உயிர் போய்விடுமோ என்கிறபோது அலோபதிக்குத்தான் ஓடி வரவேண்டும். அதிகரித்து வரும் பாரம்பரிய மருத்துவம் குறித்த கூச்சல்களை நான் வியாபார சதியாகவே பார்க்கிறேன். ஒரு சிலரின் வணிக நோக்குக்காக திட்டமிட்டு முன்னோர்கள் ஒன்றும் முட்டாள்கள் அல்ல வகையறா கருத்துகள் பரப்பப்பட்டு அவற்றை படித்த சிலருமே திரும்ப சொல்லும் நிலைமைக்கு வந்திருக்கிறோம். மேற்ச்சொன்னவற்றில் உங்களுக்கு மாற்று கருத்து இருக்கலாம். ஆனால், எந்த ஒரு அலோபதி மருந்தை அல்லது பெரும்பாலனவற்றில் ஒன்றை எடுத்துக்கொண்ட்டாலும் அதன் வேதியியல் குறியீட்டில் இருந்து அது செயல்படும் முறை, பின்விளைவுகள் என இன்று உட்கார்ந்த இடத்திலேயே நீங்கள் தெரிந்து கொள்ளமுடியும். அந்த நிலைக்கு மாற்று மருத்துவ முறைகளும் வரும் வரை அவற்றை போலி என்றே சொல்லுவேன். ஒரு போதும் அவை விவாதிக்கும் இடத்திற்கு மாற்று மருந்துக்கள் வராது என்றும் அடித்து சொல்லுவேன். அப்படி ஒரு நிலை வருமாயின் மேற்கொண்டு விவாதிக்கலாம். அதுவரை மேற்சொல்ல எனக்கொன்றுமில்லை.

திராவிட போர்வாட்கள்!

நேற்று ஜெயமோகன் ராஜன்குறையை விமர்சித்து, நாடக காதல் என்ற பதத்தை உருவாக்கியது அவரும் அவர் சார்ந்த இயக்கமும் தான். அவை ஆய்வுக்கட்டுரைகளாக வெளியிடப்பட்டு, அனைவருக்கும் தெரிந்த உண்மையாகவும் வைக்கப்பட்டு, ஏழெட்டு ஆண்டுகள் கழித்தே இராமதாஸ் அந்த பதத்தை வந்தடைந்தார் என்று குறிப்பிட்டுருந்தார்.

இன்று அந்த ஆய்வுக்கட்டுரையினை முழுமையாக படிக்க நேர்ந்தது. அதன் உரலி இதோ (https://www.jstor.org/stable/4412773?seq=1). தலித் ஆண்கள், தங்கள் ஆண்மை திமிரின் காரணமாகவும், கட்டுபாடற்ற தன்மையினாலும் ஒரு வேலையில் நிரந்திரமாக இருக்கமுடிவதில்லை. மேலும் சாகசத்திற்க்காக உயர்சாதி பெண்களை துரத்தி காதலிக்கின்றனர் என்றெல்லாம் ஆய்வுகட்டுரை போகிறது. உயர்சாதியினர் இதனாலேயே தங்கள் பெண்பிள்ளைகளை இளம்வயதிலேயே மணமுடித்து தந்துவிடுகிறார்கள் என்றும் பதிவு செய்கிறது கட்டுரை. இம்மாதிரியான ஒரு விஷயத்தை ஜெயமோகனோ, அல்லது வலதுசாரி இயக்கதினரோ வெளியிட்டு இருந்திருந்தால் இன்னேரம் என்ன நடந்திருக்கும்? ஏன் திராவிட போர்வாட்களுக்கு மட்டுமிந்த விதிவிலக்கு?

இதில் இன்னும் ஒரு சுவரசியமான விஷயம், அந்த ஆய்வு கட்டுரை எழுதியவர்களில் ஒருவர் இன்று பொருளாதார மேதை என்று அறியப்படும் ஜெயரஞ்சன் அவர்கள். ராஜன் குறை களாஆய்வு நடத்தி சேகரித்த தகவல்களை எம்.எஸ்.எஸ். பாண்டியனின் மனைவியும், ஜெயரஞ்சனும் இணைந்து எழுதி இருக்கிறார்கள். எம்.எஸ்.எஸ் பாண்டியனை தெரியாதவர்களுக்கு – திராவிடப் பேரறிஞர் என்று கொள்ளவும்.

பொதுவாக திராவிட இயக்கங்களை பாப்புலிஸ்ட் பார்ட்டீஸ் எனலாம். அந்தந்த காலத்தில் மக்கள் என்ன நினைக்கிறார்களோ அதை எதிரொலிப்பது இந்த கட்சிகளின் தன்மை எனலாம். ஆனால் அவர்கள் கொள்கை என்று வைப்பது என்னவென்று பார்த்தோமெனில் இம்மாதிரியான ஆய்வுகளை தான். இதை ஜெயமோகன் வார்த்தைகளில் சொல்ல வேண்டுமெனில்,

“இதைப்போன்ற உள்நோக்கம் கொண்ட, தன்னலம்மிக்க, ஆய்வாளர்கள் பேரழிவுகளை உருவாக்கிவிடுவார்கள். எல்லா சூழலிலும் பிற்பாடு அரசியல்வாதிகளால் முன்வைக்கப்படும் அழிவுக்கருத்துக்கள் முதலில் இவர்களால்தான் உருவாக்கப்படும். ஓர் உதாரணம் சொல்கிறேன். இன்று கன்னடச்சூழலில் தமிழர்களுக்கு எதிரான வன்முறையாக பெருகி பேரழிவை உருவாக்கிய காழ்ப்பை ஓர் அரசியல் கருத்தாக முன்வைத்தவர் சிதானந்தமூர்த்தி என்ற பேராசிரியர். அவர் ஆய்வுச்சூழலில்தான் அந்தக் கருத்தை உருவாக்கினார். அது வாட்டாள் நாகராஜ் வழியாக தெருவுக்கு வந்து தலைகள் உருள காரணமாக ஆகியது. இந்தியா முழுக்க இத்தகைய தன்னலமே நோக்கமாகக் கொண்ட, பேராசிரியர்கள் ஆய்வுச்சூழலில் உருவாக்கி வெளியே விடும் கருத்துக்கள் பேரழிவை விளைவித்திருக்கின்றன. அத்தகைய ஒருவர் ராஜன் குறை.”

பொதுவாக திராவிட இயக்கத்தினரின் மேல் வைக்கப்படும் முக்கியமான குற்றச்சாடுகளில் ஒன்று அவர்கள் பெரும்பான்மையினரான நடுநிலை சாதியினரையே தங்கள் வாக்கு வங்கியாக கொண்டு அவர்களை வைத்தே அரசியல் செய்கிறார்கள் என்பது. அதனால் தான் பிராமணர்கள் மிக குறைவாகவோ அல்லது முற்றிலுமே அல்லாத கிராமங்களில் தான் சாதியம் உக்கிரமாக பாவிக்கப்படுகிறது என்பதை வசதியாக மறந்துவிட்டு தலித்துகளின் அத்தனை இடர்களுக்கும் காரணம் பிராமணர்களே என்று முன்வைக்கிறார்கள். இந்த சூழ்நிலையில் 90களில் இந்த திராவிட அறிஞர்களால் உருவாக்கப்பட்ட நாடக காதல் பதம் இன்று வெற்றிகரமாக நிறுவப்பட்ட ஒரு உண்மையாகவே தமிழ் சமூகத்தில் புழங்குகிறது. இந்நிலையில் திராவிட இயக்கம் மெய்யகவே சமூகநீதி பற்றியெல்லாம் கவலைப்படுகிறதா என்பதே என்னுடைய சந்தேகம்!

வந்து சூழும் இருள்

மத்திய அரசு மார்ச்சில் முழு ஊரடங்குக்கு உத்திரவிட்ட போது, அரசின் பல செயல்பாட்டில் உடன்பாடில்லாத போதும் இந்த ஒன்றிற்காக மகிழ்ச்சி அடைந்தவர்களில் நானும் ஒருவன். சில நூறு தொற்றுகள் இருக்கும் போதே ஊரடங்குக்கு போவது மிகவும் பாதுகாப்பானது என நான் கருதினேன். சில பல கை தட்டல்கள் விளக்கு பிடித்தல்கள் இருந்தாலும் ஒரு ஓரத்தில் அரசின்‌ மீது கொஞ்சம் நம்பிக்கை இருந்தது. ஆனால் கூலி தொழிலாளிகளை கையாண்ட விதம் மத்திய மாநில ஒருங்கிணைப்பு போன்ற செயல்பாடுகள் சந்தேகத்தை அதிகரிக்கவே செய்தன. நான் சற்றும் எண்ணியிராத ஒன்று பொருளாதாரம்! கீழ்மத்தியதர ஏழை குடும்பங்கள் எந்த அளவு பாதிக்கப்பட்டன என்பதை கண்கூடாக கண்டேன். சூரத்தில் கூலி வேலை செய்யும் மகன் பணம் அனுப்ப முடியாததால் தற்காலிகமாக வீடு வீடாக யாசகம் கேட்டு அலைந்த முதியவர் ஒருவரை கண்டபோது தான் ஊரடங்கின் தீவிரம் புரிந்தது. அதே சமயம் இத்தனை வேதனைகள் பலனை அளித்தனவா என்றால் தினமும் எக்ஸ்பொனண்ட்சியலாக எகிறும் தொற்று எண்ணிக்கைகளே விடையாக அமைந்தன. சற்றே யோசிக்கையில் அரசு குருட்டு பூனை விட்டத்தில் பாய்ந்த கதையாக என்னத்தையோ செய்து வைத்திருப்பது தெரிகிறது! எக்னாமிஸ்டுகளையோ, எபிடமிஸ்டுகளையோ அரசு கலந்தாலோசித்ததாக தெரியவில்லை. நியூசிலாந்தில் ஆயிரமாவது தொற்றின் போதே சமூகபரவல் ஆரம்பித்துவிட்டதாக கூறி நடவடிக்கைகளை முடுக்கி விட்டது நியூசிலாந்து அரசு. ஆனால் லட்சத்தை கடந்த பின்னும் சமூக தொற்றா அப்படியென்றால் என்று கேட்டுக் கொண்டிருக்கிறது அரசு. குறைந்தபட்சம் நார்டிக் நாடுகளை போலாவது அபாய கட்டம் வரை பொறுத்து பின் ஊரடங்குக்கு வந்திருந்தால் பொருளாதாரத்தை கொஞ்சம் காப்பாற்றி இருக்கலாமோ என தோன்றுகிறது. விவாசாயம் மற்றும் அமைப்பு சாரா தொழில்களே இந்திய பொருளாதாரத்தின் முதுகெலும்பாக இருந்து வந்திருக்கிறது. இந்த அரசு பொறுப்பேற்றதில் இருந்து அதை சிதைக்கும் முயற்சியிலேயே மும்முரமாக இருந்தது. இப்போது அதோடு கொரனாவும் சேர்ந்து வேகத்தை அதிகப்படுத்தியிருக்கிறது. இன்னுமும் வாய்ப்புகள் இருக்கிறது. ஆனால் மத்தியிலும் மாநிலத்திலும் ஆட்சி செய்பவர்களை நினைக்கும் தோறும் அவநம்பிக்கையும் வெறுப்புமே வந்து சூழ்கிறது. நமக்கு தேவை ஒரு தலைவன். ஆனால் அப்படி யாரும் இப்போதைக்கு இல்லை அல்லது இருக்க வேண்டிய இடத்தில் இல்லை என்பதே நிதர்சனம்!

இனி எல்லோரும் விவசாயி ஆகிவிடலாமா?

இந்த குவரண்டைன் நாட்களில் வாட்சப் பார்வர்டுகளில் வாருங்கள் இயற்கைக்கு திரும்புவோம், விவாசாயிகளை ஆதரிப்போம் என்ற குரல்களை கேட்கிறேன். கிராமிய தன்னிறவு பொருளதாரம் என்று சொல்லப்பட்டாலும், பெரும்பாலானவை முன்னோர்கள் ஒன்றும் முட்டாள்களில்லை வகையறா தான். என் சிற்றறிவுக்கு எட்டிய வரை இதை வகுத்துக்கொள்ள முயல்கிறேன்.

ஏறத்தாழ பத்தாயிரம் ஆண்டுகளுக்கு முன் மனிதர்கள் விவசாயத்தை தொடங்கினார்கள் என்கிறார்கள். ஆற்று சமவெளிகளில் தொடங்கிய விவசாயம் மனித குலத்தின் ஒரு மாபெரும் பாய்ச்சல் என்றே சொல்லலாம். அலைந்து திரிந்து கொண்டிருந்தவர்கள் நிலையாக ஒரிடத்தில் அமையவும், அதிலிருந்து குடும்பம், அரசு தனிச்சொத்து போன்றவை வலுப்பெற்றதையும் பார்க்கலாம். ஆனால், ஆயிரத்து ஐந்நூறு ஆண்டுகளுக்கு முன்னர் தான் விவசாயம் ஒரு திட்டவட்டமான பொருளியல் அமைப்பாக வலுப்பெற்றது. தமிழக வரலாற்றையே பார்த்தால், சோழர்கள் காலத்தில், புதிய ஏரிகள், குளங்கள், கால்வாய்கள் வெட்டப்பட்டு நீரியல் மேலாண்மை செம்மையாக்கப்பட்டது. பின்னர் நாயக்கர்கள் காலத்தில் இது மேலும் வலுப்படுத்தப்பட்டது. கிராமிய அமைப்பே விவசாயத்துக்கு சாதகமானதாக மட்டும் உருவாக்கப்பட்ட ஒன்று எனலாம். ஆடுகள், மாடுகள் போல மனிதர்களில் ஒரு பகுதியினரை சாதியால் விலக்கி அவர்களின் மனிதவளம் உறிஞ்சப்பட்டது. இது பொருளியல் ரீதியாக சாதகமானதாகவும், இப்படிப்பட்ட அமைப்பின் மூலம் மட்டுமே உபரியை அடையமுடிந்ததாகவும் இருந்ததால், இந்த அமைப்பு ஆயிரத்து முன்னூறு ஆண்டுகள் சிதையாமல் இருந்துள்ளது. இது இந்தியாவில் மட்டுமல்ல, கருப்பின அடிமைகளில் இருந்து மேலும் பல உதாரணங்கள் மூலம் இதை உலகம் எங்கும் பார்க்கலாம்.

ஆனால், தொழில்புரட்சி இயந்திரமயமாக்கலை கொண்டு வந்த போது இந்த அமைப்புகள் சிதற தொடங்கின. தண்ணீர் பாசனத்தில் இருந்து, உழவு, விற்பனை வரை இயந்திரங்களின் பங்கு விவசாயத்தில் நேரடி தாக்கத்தை உண்டாக்கியது. மேலும் தொழிற்சாலைகளின் வருகை அடிமைப்பட்டு கிடந்தவர்களுக்கு பொருளியல் சுதந்திரத்திற்கான ஒரு மாபெரும் வாய்ப்பாக உருவாகியது. 19ம் நூற்றாண்டின் இறுதியில் சென்னையில் இருந்த ஐஸ் பேக்டரி போன்ற இடங்களில் தாழ்த்தப்பட்டவர்களே அதிகம் வேலை செய்ததாக தெரிகின்றது. இது சிறிது சிறிதாக நிலவுடமை அமைப்பை சிதைத்தது என்றால் மிகையல்ல. உழுவதற்கு எருது, அதன் சாணம் உரம், வயலின் வைக்கோல் மாட்டுக்கு உணவு என்பதில் இருந்து, உழ ட்ராக்டர், செயற்கை உரம் என வெளி தேவைகளாக உருமாறியது. காரணம், அதிகரித்த மக்கள் தொகை, அதீத உணவு உற்பத்தியைக் கோரியது. செயற்க்கை உரமும், இயந்திரங்களின் பங்களிப்பும் இல்லாதிருந்திருந்தால் பல்லாயிரக்கணக்கானோர் பட்டினியிலேயே இறந்திருக்கக் கூடும்.

இன்று விவசாயம் லாபகரமானது அல்ல என்ற நிலைக்கு வந்துவிட்டதாக சொல்கின்றனர். விவசாயிகளின் தற்கொலைகளில் இருந்து, வீட்டுமனைகளாகும் வயல்கள் வரை எல்லோருக்கும் தெரிந்த தகவல்கள் தான். விவசாயத்தின் வீழ்ச்சிக்கு என்ன காரணம்? என் வரையில் இந்த மூன்றினைக் கூறுவேன். சீசனல் என்று சொல்லக்கூடிய பருவம் சார்ந்த விதைப்பு, உற்பத்தி – நுகர்வு சங்கிலி சார்ந்து திட்டமிடாதது, இறுதியாக இடைத்தரகர்கள். எனக்கு தெரிந்து கூடை முப்பது ரூபாய் என்று கொள்முதல் செய்யப்படும் தக்காளி பத்து கிலோமீட்டர் தள்ளி சந்தையில் கிலோ இருபதாக இருக்கும். எரிபொருள், உரம், வாகனத்துக்கு என வெளி ஆட்களை கொண்டுவர விவசாயம் அதிக மூலதனத்துக்கான தேவையை உண்டாக்கியது. இது கடனாகவே பெரும்பாலும் பெறப்படுகின்றது. இதனால் ஓரிரு வெள்ளாமை பொய்த்தாலே அதீத கடன் விவசாயிகளை நெருக்கத்தொடங்கி விடுகிறது. விவசாயிகளுக்கும் இது தெரியும், ஆனால் கட்டுபடுத்த கூடிய அளவிற்கு அவர்கள் பெரிய அமைப்போ, அல்லது சேமித்து வைக்க குளிர்பதன கிடங்குகளையோ ஏற்படுத்தும் அளவுக்கு வசதியோ இல்லாதவர்கள். இன்னுமும் நமது கிராமிய சமூகம் சாதி சார்ந்தே இருப்பதும், விவசாயிகள் பெரும் அமைப்பாக திரள்வதை தடை செய்கின்றன. மேலும் பருவம் சார்ந்து விதைக்கும் போது, வானிலையின் சிறு மாற்றமும் பெரும் இழப்பாக மாறுகின்றது. குறிப்பாக புவி வெப்பமடைதலால் அதீத பருவ மாற்றங்களை எதிர்கொள்ள வேண்டி வரும் நாட்களில் இது ஒரு பெரும் பிரச்சனையா உருவெடுக்கக்கூடும். அதே போல ஒரே சமயத்தில் ஒரே பயிரை பலரும் விதைக்கும் போது இயல்பாகவே சப்ளை – டிமாண்ட் செயினில் அதித ஏற்தாழ்வுகள் நட்டமாக உருவெடுக்கின்றன.

இந்த நிலையில் முற்றிலும் இயற்க்கை விவசாயம் என்பதை போன்ற ஏமாற்று வேலை வேறு இருக்க முடியாது. காரணம், குறைவான மனிதவளத்தில் இருந்து உற்பத்தி அளவு வரை பல இடங்கள் கேள்விக்குறியது. குறிப்பாக இயற்கை உரங்கள் இடுகையில் ஒரு சில விதைப்புகளுக்கு பிறகு நிலத்தின் உற்பத்தி குறைவதாக சிலர் சுட்டிக்காட்டுகின்றனர். 2050ல் உலக மக்கள் தொகை 20 பில்லியனை தொடும் என்கிறது ஐக்கியநாடுகளின் சபை அறிக்கை ஒன்று. ஆனால் இப்போதைய விவசாய நிலத்தில் இருந்து அதிகபட்சம் 4% மட்டுமே புதிய நிலங்களை உருவாக்குவதற்கான சாத்தியக்கூறுகள் இருப்பதாக அதே அறிக்கை சுட்டி காட்டுகிறது. நிச்சயமாய் வரும் காலங்களில் மக்கள் தொகை இன்னும் தான் பெருகும் என்கிற நிலையில், இயற்க்கை விவசாயம் எந்த அளவுக்கு தேவைகளை நிறைவு செய்யும் என்பது சந்தேகத்திற்க்குரியதே. மேலும் இப்போதைய விவசாய முறை அதீத தண்ணீரை வீணடிப்பதாகவும், புவி வெப்பமயமாதலுக்கு பெரும் பங்களிப்பு செய்வதாகவும் இருக்கிறது. மரபான பயிர்கள் பொதுவாக அதிக சக்தியை உட்கொண்டு குறைவான மகசூல் தருபவை என்பதையும் கவனிக்க வேண்டும். உலகம் ஒற்றை ஊர் என மாறிவரும் காலங்களில் உள்ளூர் பிரச்சனை உலகளாவிய பிரச்சனை என்று பிரித்து பார்க்கவேண்டியிருக்காது என நினைக்கிறேன். எனவே முன் போல என் குடும்பம், என் கிராமம் என்பதற்கான சாத்தியங்களும் குறைவு தான்.

இப்போதைக்கு மனிதர்களின் உணவு பழக்கத்தில் மாற்றம் வரும் என்பதாக தெரியவில்லை. தேவை இருக்கிறது. எப்படி லாபம் பார்ப்பது? பழங்குடி வாழ்க்கையில் இருந்து நிலவுடமை சமூகத்திற்கும், பின் அதிலிருந்து இயந்திரமயமாக்கலுக்கும் வந்தோம். இந்த இருபது ஆண்டுகளில் தொலைத்தொடர்பு சார்ந்து பெரும் பாய்ச்சலை நிகழ்த்தியிருக்கிறோம். இன்று ஓவ்வொரு துறையுமே தகவல் தொடர்பு சார்ந்து தங்கள் உற்பத்தி முறைகளில் மாற்றம் கொண்டுவர, அது விவசாயத்திலும் நிகழ்வது தான் நியாயம். பெரும் குளிர்பதன் கிட்டங்கிகளை உருவாக்குவதை காட்டிலும் தேவைக்கு ஏற்ப உற்பத்தி செய்யலாம் என்கிற நிலைக்கு சென்று கொண்டிருக்கிறோம். வானிலையை சார்ந்து இருப்பதில் இருந்து பெரிய பச்சை குடில்களில் விவசாயம் பார்ப்பது லாபகரமானது என்கிறனர் சில early adopters. இம்மாதிரியான குடில்களில் சூழ்நிலையை துல்லியமாக கணிக்கமுடியும் என்பதில் இருந்து செயற்க்கை நுண்ணறிவைக்கொண்டு ஆரம்பத்திலேயே செடிகளை தாக்கும் நோய்களை கண்டறிவது, மண் இல்லாமல் குறைவான இடத்தில் அதிக உற்பத்தி தரும் ஏரோபோனிக்ஸ் போன்றவை தான் விவசாயத்தின் வருங்காலமாக இருக்க முடியும். ஏற்கனவே ஸ்வீடன், ஜப்பான் போன்ற நாடுகள் இதன் சாத்தியத்தை உணர்ந்துள்ளதாக தெரிகிறது. இந்தியாவிலேயே, ஆந்திர மாநிலத்தில் மைக்ரோசாப்ட் 175 தேர்ந்தெடுத்த விவசாயிகளுக்கு விதைப்பு, நில மேலாண்மை, உரம் சார்ந்த தொழில்நுட்ப தகவல்களை வழங்குகிறது. இதன் மூலம் 30% உற்பத்தி திறன் அதிகரித்துள்ளது. மேம்படுத்தபட்ட சூழ்நிலைகளில் செயற்கை அறிவின் துணையோடு மிகக்குறைந்த மனித வளத்தில் உற்பத்தியில் தன்னிறைவையும் எட்டமுடியும். இதற்காக பாஷ் போன்ற நிறுவனங்கள் நிலவளத்தை கண்கணிக்கும் கருவிகளையும், ரோ-பாட் போன்ற நிறுவனங்கள் அறுவடை கருவிகளையும் உற்பத்தி செய்யத்தொடங்கியுள்ளன. மேலும் துல்லிய விவசாயம் என்று ட்ரோன்கள் மூலம் பயிர்களை கண்காணித்தல், நோய்களை கண்டறிதல், அறுவடைக்கு தயாரன பயிர்கள் குறித்த தகவல்களை திரட்டுதல் என பல சாத்திய கூறுகளை விஞ்ஞானிகள் முன் வைக்கிறார்கள். நாம் செய்ய வேண்டியதெல்லாம், திறந்த மனதோடு தொழில்நுட்பத்தை வரவேற்பதே ஆகும்.

இறுதியாக, எல்லோரும் விவசாயி ஆக வேண்டுமா? தேவையில்லை. இஞ்சினியர், மருத்துவர் போல இதுவும் ஒரு தொழில் என்ற புரிதல் மட்டுமே நமக்கு வேண்டும். புனிதப்படுத்துவதால் எதனையும் அடைய இயலாது. வேதியலில் பிரபலமான ஒரு கூற்று ஒன்றுண்டு. If you’re not the part of the solution, you’ll be precipitated. விவசாயத்திற்கும் இது பொருந்தும்.

மஞ்சள் மாதினங்கள்

இந்த குளிர் தினம் சில நினைவுகளை கொண்டு வருகிறது. இன்று மலர்கள்.

மார்கழியில் இருந்து மாசி, தை, பங்குனி வரை மலர்களின் காலம். குறிப்பாக மஞ்சள் மலர்கள். ஐப்பசி மழை இண்டு இடுக்கிலெல்லாம் பச்சையை தூவி விட்டு போக, அடுத்த இரண்டு மூன்று வாரத்தில் சின்ன நட்சத்திரங்கள் என வெள்ளையும், நீலமும், அதிகமாக மஞ்சளும், அதிசயமாக சிவப்பிலும் மலர்கள் எட்டி பார்க்கும். சின்ன வயதில் டிசம்பர் என்பது ஒரு பூ மலரும் மாதம் என்றே நினைத்திருந்தேன். வீட்டின் பின்புறம் ஊதாவும், மஞ்சளுமாய் பூத்துக்கிடக்கும். அம்மாவுக்கு மிகப்பிடித்த மலர்களுள் ஒன்று. பள்ளிக்கு செல்லும் முன் எடுக்கப்பட்ட என் அனைத்து புகைப்படங்களிலும் தவறாமல் ஒரு சரம் டிசம்பர் பூக்கள் என் தலையை அலங்கரித்திருக்கும்.

பின் மார்கழி வந்தால் அதிகாலையில் உசுப்பி விடப்பட்டு, பூசணி பூக்கள் தேடி அனுப்பப்படுவோம். தெருவின் கடைசியில் பால்காரர் வீட்டு போர்பட்டி வைக்கோல் அடுக்குகளுக்கு அருகில் பூசணிக்கொடிகள் பரவிக்கிடக்கும். ஒரு நாளைக்கு ஒரு பூ தான். கொண்டு வந்தால், வீட்டின் முன் கோலத்தில் சாணி பிள்ளையார் தலை மேல் நாள் முழுவதும் அலங்கரித்திருக்கும்.

தை, மெல்லிய வெய்யிலோடு ஆவரம் பூக்கள் சிரித்து பேசிக்கொண்டிருக்கும் மாதம். தை மாதம் காப்புகட்ட ஆவாரம் பூவையும், பூலப்பூவையும் தேடி அலைவது இன்னும் ஒரு சுவரசியமான நினைவு. அப்போது தான் திண்ணப்பா நகர் உருவாகி வந்து கொண்டிருந்தது. அதையும் தாந்தோணியையும் இணைக்கும் ஒத்தையடி பாதையை தவிர்த்தால் வெறும் செம்மண் காடு. பனையும், வேம்பும், சீத்தமரங்களும் விரவிக்கிடக்க இடையில் ஆவாரம் எட்டி பார்க்கும். சரியாக ஓரிரு நாட்களுக்கு முன்பே சென்றுவிட வேண்டும். விட்டுவிட்டால் ஆடு மேய்ப்பவர்கள் பறித்து கட்டி லைட் ஹவுஸ் திருப்பத்தில கத்தை ஐந்து ரூபாய் என்று விற்பதை வாங்க வேண்டும். நான் பாரதிதாசனுக்கு வந்த போது, சாலைகளையும், கட்டிடங்கள் இருந்த இடங்களை தவிர்த்து எங்கும் ஆவாரமாய் கிடந்தது. காப்புகட்ட ஒரு கொத்துக்கு ஒரு கீற்று ஆவரையில் இருந்து, கட்டில் மொத்தமாய் பாரதிதாசனின் மஞ்சள் மலர்கள் வீட்டில் சிரிக்க ஆரம்பித்தது.

தை கடைசியில் ஆரம்பித்து, மாசி மாதமெல்லாம் விடுதியில் நின்றிருந்த சரக்கொன்றை பூக்க ஆரம்பித்துவிடும். வேறெந்த மலரும் அத்தனை அழகாய் இருக்குமா எனத்தெரியவில்லை. கொன்றை மட்டுமே மகிழ்ச்சி பீறிடும் ஒளி துகள்களாய் வெடித்து ஆடிக்கொண்டிருக்கும். என் வாழ்க்கையில் ஏதாவது மலரை அதிகமுறை புகைப்படமெடுத்திருப்பேன் என்றால் அது சரக்கொன்றையாய் மட்டுமே இருக்கும். இன்னும் அதன் மீதாதான பைத்தியம் தீர்ந்த பாடில்லை.

பங்குனியில், இளவேனிலில் இன்னும் பல மரங்கள் பூக்க, வேம்பும், புங்கையும் இலை பழுத்து உதிர்க்கத் தொடங்கும். பின் அனைத்தும் பற்றியெரியும் முதுவேனில் நிலமொன்றில், பகலில் தன் அடர்நிலலில் பருத்த அரிசியென புங்கை பூக்கள் சிதறிக்கிடக்க, மெல்லிய குளிர் தெரியும் இரவுகளில் வேம்பூவின் வாசனை மெல்லிய தூரத்து நட்ச்சத்திரமென உடன் வரும்.

மல்லிகை மணாளனே சென்னமல்லிகார்ஜீனா

அக்கமகாதேவி கர்நாடகத்தின் ஆண்டாள் என்று அழைக்கப்படுபவர். பன்னிரண்டாம் நூற்றாண்டில் வாழ்ந்த இவரின் நவீன கவிதை போன்ற “வசனங்கள்” வீரசைவர்களிடம் மிகவும் பிரபலம். ஏறத்தாழ 300 இருக்கலாம் என கருத்தப்படும் இவை அக்கமகாதேவி வாக்குகள் என்ற பெயரில் தொகுப்பட்டு, புத்தகமாக கிடைக்கின்றது. சங்க இலக்கியத்தை உலகுக்கு அறிமுகப்படுத்திய ஏ.கே.ராமானுஜனே இப்பாடல்களின் முதல் ஆங்கில மொழிபெயர்ப்பாளர். தற்போது ஏறத்தாழ 30 ஆண்டுகள் கழித்து வினய சைதன்யாவால் இவை மேலும் மெருகூட்டப்படு Songs of Siva என்ற பெயரில் Harper Perennialஆல் பதிப்பிக்கப்பட்டிருக்கின்றது.

Image Courtesy: Vikatan.com

அருமையான மொழியில், வாசிக்க எளிமையாக இருக்கின்றது புத்தகம். பாடல்களை பற்றி பார்க்கும் முன் பின்னணி தகவல்களை கொஞ்சம் பார்த்துவிடலாம். ஆண்டாள் மற்றும் பிற கதைகளைப்போலவே, சிறிய வயதிலேயே தன் கிராமத்தில் இருக்கும் சென்னமல்லிகார்ஜீனனை (சிவன்) மனதில் வரித்துகொள்கிறாள் மகாதேவி. ஆனால், ஜைன மன்னனை குடும்பத்தின் கட்டாயத்தின் பேரில் மணமுடிக்க நேர்கிறது. எப்பொதும் சிவனை தொழ அனுமதிக்கவேண்டும், அவன் அடியவர்கள் எவர் வரினும் அவர்களை பார்க்க அனுமதிக்க வேண்டும், குருவை சந்திக்க எந்த நேரமாயினும் அனுமதிக்க வேண்டும் என்ற மூன்று நிபந்தனைகளின் அடிப்படையில் மன்னன் கெளசிகனை கரம் பற்றுகிறாள் மகாதேவி.

ஆனால் வெகுசீக்கிரத்தில் கெளசிகன் இந்நிபந்தனைகளை மீறுகின்றான். எனவே அவனையும் துறந்து, தன் உடலே தன் துன்பத்துக்கு காரணமென நினைத்து தன் ஆடைகளையும் துறந்து, தன் கூந்தலை மட்டுமே ஆடையாக உடுத்தி ஷ்ரீசைல மலைக்கு செல்கிறார். பின்னர், பசவண்ணரின் வீரசைவ இயக்கத்துக்கு தன்னை முழுமையாக அர்பணித்து, சென்னமல்லிகார்ஜீனனுக்கு பாடல் புனைவதையே தன் வாழ்வென கொள்கிறார். மல்லிகார்ஜீனனை தவிர்த்த பிறர் தன் சகோதரர்கள் என்று குறிப்பிட்டதால் மக்களால் அக்கமகாதேவி என்றழைக்கப்படுகிறார். பிற்காலத்தில் பல நூல்களில் இந்த கதை திரும்ப திரும்ப குறிப்பிடப்படுவதால், இது உண்மையான நிகழ்வாகவே இருக்கக்கூடும்.

Image Courtesy: Vikatan.com

பன்னிரண்டாம் நூற்றாண்டு ஏறத்தாழ சைவ, வைணவ மதங்களின் பொற்காலம். புத்த, சமண மதக்கருத்துக்கள் இம்மதங்களால் உள்வாங்கப்பட்டு, புதிய பிரிவுகள் உண்டாகிக்கொண்டிருந்த நேரம். அதனடிப்படையில் பார்த்தால், இரண்டு வகைகளில் அக்கமகாதேவியின் வாழ்க்கை முக்கியமாகின்றது. முதலாவது, அப்போது கர்நாடகத்தில் ஜாதி பேதங்களை மறுத்து, வேதங்களை அறிவது மட்டுமே கடவுளை அறிவது அல்ல என்று கூறி சம்ஸ்கிருதத்தை மறுத்து, கன்னடத்தில் வசன கவிதைகள் மூலமாக சைவத்தை பரப்பிய பசவண்ணரின் வீரசைவம் வேகமாக பரவிக்கொண்டு இருந்தது. அதில் ஒரு முக்கிய பங்காற்றியதாக அக்கமகாதேவியின் வசனங்களைச்சொல்லலாம். மேலும் சமணதின் தாக்கத்தில் பெண்ளுக்கு, ஆண் அடைய விரும்பும் உண்மைநிலையை அடையவிடாமல் தடுப்பவள் என்ற நோக்கில், பல சமய கட்டுபாடுகளும், ஆடை துறத்தல் போன்ற சடங்குகளும் தடை செய்யப்பட்டிருந்தன. அவைகளை அக்கமகாதேவி மீறியதன் மூலம் ஐந்து விதமான தீட்டுகள் (தூமைத் தீட்டு, சாவுத் தீட்டு, குழந்தைப் பேறுத் தீட்டு, சாதித் தீட்டு, மற்றும் கைம்பெண் கோலம்) சரணர்களுக்கு (வீரசைவத்தை தழுவியவர்கள்) இல்லை என வீரசைவம் ஏற்றது.

அக்கமகாதேவியின் வசனங்களை, (1) உடல், காமம் போன்ற கீழ்மைகளால் வரும் துன்பம் (2) மாயையினால் வரும் துன்பம் (3) தன் துறவை பற்றிய விளக்கம் (4) சென்னமல்லிகார்ஜீனன் மீதான காதல் என நான்காக பிரிக்கலாம். பொதுவாக சாதரண மதக்கருத்துகளையே முன்வைத்தாலும் அவை சொல்லப்படும் தன்மை என்ற வகையில் இவ்வசனங்கள் முக்கியமாகின்றன. மேலும், ஆண்டாள், மீரா போன்று பெண் என்ற நிலையில், பித்தாகி, கடவுளையே தன் கணவனென எண்ணி உருகும் வகையிலான வசனங்கள் மிகவும் குறைவு. ஒன்பதாம் நூற்றாண்டில் தமிழகத்தில் இருந்து வடக்கு நோக்கி புறப்பட்ட பக்தி இயக்கம், பிற தத்துவ மதங்களோடு சேர்ந்து தன் அடிப்படை நெகிழ்வு மற்றும் இசை தன்மையில் இருந்து விலகி கெட்டிபட்டிருப்பதை அக்கமகாதேவியின் வசனங்களில் இருந்தே காணலாம். எனவே ஆண்டாள் தரும் மயக்கமோ அல்லது தேவாரத்தின் கவிதைத்தன்மையோ இக்கவிதைகளில் அமைவதில்லை. தத்துவநோக்கு, கூர்மை, எளிமை என்பதே பெரும்பாலான வசனங்களின் அமைப்பு. ஆனாலும் beautiful as jasmine; but pointed like arrow என ஆங்காங்கு கவித்துவம் மிக்க வரிகள் இவை கவிதைகளும் கூட என்கின்றன.

கீழ்கண்ட வசனங்கள் என்னளவில் ஒரு தரிசனத்தை தருவதாக அமைந்தன.

stream behind, river ahead
which is the way?
lake behind, trap ahead
which is easy?

Once you have eaten the fruit,
Does it matter who prunes the tree?
Once you have left your woman,
Does it matter who sleeps with her?
Once you have sold your land,
Does it matter who ploughs it?
Once Channamallikarjuna, jasmine-tender,
Is (not) known, does it matter whether
The body is eaten by dogs or rots in water?

What is full won’t spill,
What has trust won’t doubt,
What has come together won’t part,
What is wholly known won’t be forgotten.
O Channamallikarjuna, jasmine-tender,
The devotee in whom you are well pleased
Will have boundless joy.

One has the here, another the hereafter,
One has no here, another no hereafter.
Another has neither here nor hereafter.
Those who have taken refuge in
Channamallikarjuna, jasmine-tender,
Have both the here and hereafter.

அக்கமகாதேவியிடம் தேவாரம், திருவாசகம் மற்றும் பிரபந்தத்தின் தாக்கம் இருப்பதை கீழ்காணும் பாடல்களில் இருந்து அறிய முடிகிறது.

> Don’t be destroyed, don’t be destroyed,
> Hold fast to the feet of Siva.
> This body of yours is not indestructible,
> The pleasures of the world do not last forever.
> Before the word that Channamallikarjuna, jasmine-tender,
> Wrote is wiped off,
> Take refuge in Siva, soon.

> With a floor of emeralds,
> Festoons of gold and diamond pillars,
> A roof of coral,
> Pearls and jewels for ceiling,
> I was married;
> My people had me married.
> With bracelets and amulets
> And everlasting food stock,
> I was given in marriage to
> Channamallikarjuna, jasmine-tender.

> Actions won’t reach you;
> How will I worship you?
> Sounds won’t reach you;
> How will I sing of you?
> If the body reaches,
> You are invisible greatness;
> How shall I wear you in my palm?
> Not knowing anything of myself,
> Looking at you again and again
> I am amazed,
> O Channamallikarjuna, jasmine-tender.

ஆண்டாள் பாடல்கள் போன்ற கவித்துவமான அழகான கற்பனைகளையும் சில வசனங்களில் காணமுடிகின்றது.

> Listen, O sister, I had a dream:
> I saw rice, betel nut, coconut
> And palm leaf festoons;
> I saw the mendicant with small matted locks
> And shining pearly teeth,
> Come begging, O sister.
> I ran after him and caught him by the hand
> While he was running away;
> Seeing Channamallikarjuna, jasmine-tender,
> I opened my eyes.

> Don’t trust him
> For his coaxing ways;
> He is a cheat, this knower of the world.
> Showing liberation,
> He makes you forget devotion,
> Channamallikarjuna, jasmine-tender.

என்ன தான்,

> If you plant chaff instead of rice,
> Will it ever grow and give grain,
> Even if irrigated with holy water?
> Those without wisdom may
> Observe all the rules;
> Will they ever come to happiness,
> Free of desire?
> The scent that wafts, will it stay in one place?
> Those who do not know my god
> Channamallikarjuna, jasmine-tender,
> Know not the way of conduct.

போன்ற தத்துவார்த்தமான வரிகள் இருப்பினும், பெண் என்பதால் வரும் இன்னல்கள் பல சமயங்களில் அக்கமகாதேவியிடம் கேள்விகளை எழுப்புகின்றதாக தோன்றுகிறது. தான் ஒரு ஆணாக இல்லையே என நினைப்பதாகவும் தோன்றுகிறது. அர்நாரீஸ்வரனின் நோக்காக புரிந்து கொள்ளப்படும் இவ்வசனம் சில முக்கியமான கேள்விகளை மெளனமாக எழுப்புகின்றது.

> What if I am called by a woman’s name?
> In meditation, my form is masculine,
> O Basava, by your kindness.
> Restraining the over-lustful
> Channamallikarjuna, jasmine-tender,
> I am united, not knowing the two,
> O Basava, by your mercy?

கடவுளை புரிந்துகொள்ள அல்ல பெண்களை புரிந்து கொள்ளவாவது கட்டாயம் ஒரு முறை அக்கமகாதேவியை வாசிக்க வேண்டும்.


மேலும் தகவல்களுக்கு:

  1. பாவண்ணனின் அக்கமாகதேவி குறித்த சொல்வனம் கட்டுரை இணைப்பு
  2. பெருந்தேவியின் விகடன்-தடம் கட்டுரை இணைப்பு